Bayragıbıznı keñi, uzunu duniyada cürügen standart ölçeledile. Bayrak üç teñ kesekge üleşinedi. Baş canında boyav – köm-kökdü – çeksiz çuvak Köknü belgisi; biz Teyri adamı, Teyri halkı, Türk halkı bolganıbızga şagatlık etedi. Ekinçi kesegi – cap-caşil betlidi; bügün biz islam musliman halk bolganıbıznı belgisidi. Caşil boyavda, caşil nürde uçub bargan çımmak-ak kanatlı – Miñi Tavubuz – Kavkaz curtubuznu, miyiklikni, tazalıknı belgisidi. Bayraknı em tübünde boyav – kızıldı. Bu curtnu cavladan saklay, halknı tögülgen kanını belgisidi. Bayrak «Camagatnı» (KDO) cıyılıvunda emda Karaçay halknı Közüvsüz kurultayında-sezdinde kabıl etilgendi.
Millet Belgile
Bilal Laypan
Karaçaynı Bayragı
Bayragıbıznı keñi, uzunu duniyada cürügen standart ölçeledile.
Bayrak üç teñ kesekge üleşinedi. Baş canında boyav – köm-kökdü – çeksiz çuvak Köknü belgisi; biz Teyri adamı, Teyri halkı, Türk halkı bolganıbızga şagatlık etedi. Ekinçi kesegi – cap-caşil betlidi; bügün biz islam musliman halk bolganıbıznı belgisidi. Caşil boyavda, caşil nürde uçub bargan çımmak-ak kanatlı – Miñi Tavubuz – Kavkaz curtubuznu, miyiklikni, tazalıknı belgisidi. Bayraknı em tübünde boyav – kızıldı. Bu curtnu cavladan saklay, halknı tögülgen kanını belgisidi.
Bayrak «Camagatnı» (KDO) cıyılıvunda (03.04.1991) emda Karaçay halknı Közüvsüz kurultayında-sezdinde (13.07.1991) kabıl etilgendi.
Karaçaynı Tamgası
Bayragıbızda bolgan boyavla-maganala saklanadıla Tamgabızda da.
Cañız, Kökden Cerge-Curtha sozulgan Aynı kuçagındadı Miñi Tav cetimüyüş culduzu bla başında. Ak bars çekni saklaydı. Ak bars (kar bars) Alan kralıbızdan kelgen belgidi. Ay bla culduz islam dinni belgisidi. Culduznu cetimüyüş bolganı – «cetini»- taşa, turu da köb maganası bolganından çıgadı. Tamga üç boyavlu kurşovnu içindedi.
Millet Tamgabız «Camagatnı» (KDO) cıyılıvunda (03.04.1991) emda Karaçay halknı Közüvsüz kurultayında-sezdinde (13.07.1991) kabıl etilgendi.
Karaçaynı Millet Oraydası-Marşı
KARAÇAY
Beştav canı, Arhız, Mahar, Teberdi...
Miyik Curtnu bizge Teyribiz berdi,
Miñi Tavnu Senñe tıyınşlı kördü,
Culduz halkı, Teyri halkı Karaçay!
Miñi Tavnu Senñe tıyınşlı kördü,
Culduz halkı, Teyri halkı Karaçay!
Ne zalimni allında da bügülmey,
Kara kün da erkinlikden tüñülmey,
Taş başında caşav ete kelgense,
Ötgür millet, öhtem millet Karaçay!
Taş başında caşav ete kelgense,
Ötgür millet, öhtem millet Karaçay!
Nença kere KÜNÜ, AYI tutulgan,
Ança kere celmavuzdan kutulgan,
Temirlege, Kurçlaga da katılgan,
Dev halisin körgüztgendi Karaçay!
Temirlege, Kurçlaga da katılgan,
Dev halisin körgüztgendi Karaçay!
Üzmegense nartüh, arpa urlugun,
Cigitlikni, adamlıknı korlugun,
Burun kibik kral kuradıñ, kurduñ,
O nart halkı, alan halkı Karaçay!
Burun kibik kral kuradıñ, kurduñ,
O nart halkı, alan halkı Karaçay!
Bardı seni Allahıñ da, tiliñ da,
Ösüb kelgen sarıcilik tölüñ da,
Katılmazla Senñe kartlık, ölüm da,
Ömürlege caşarıksa Karaçay!
Katılmazla Senñe kartlık, ölüm da,
Ömürlege caşarıksa Karaçay!
Alan Halkıbıznı millet oraydası-marşı-gimni
AS-ALAN
Beş Tav Eli – koşulgan cer nür bla kar –
Bashan, Çegem, Holam, Bızıñı, Malkar;
Beştav canı, Arhız, Mahar, Teberdi...
Cer cannetin ullu Allah bizge berdi,
Miñi Tavnu Senñe tıyınşlı kördü,
Oy Karaçay-Malkar halkı – As-Alan!
Teyri adamı, Teyri halkı, as-salam!
Kara tanıgan bilim halkı, orayda!
Ne zalimni allında da bügülmey,
Kara kün da erkinlikden tüñülmey,
Taş başında caşav ete kelgense,
Ötgür millet, öhtem millet As-Alan!
Ötgür millet, öhtem millet, as-salam!
Kablan köllü cigit millet, orayda!
Nença kere Künü, Ayı tutulgan,
Ança kere celmavuzdan kutulgan,
Temirlege, Kurçlaga da katılgan,
Oy türk halkı, ak bars halkı, As-Alan!
Türk-musliman Kavkaz halkı, as-salam!
Türk-musliman Kavkaz curtu, orayda!
Üzmegense eçki, arpa urlugun,
Cigitlikni, adamlıknı korlugun,
Burun kibik kral kuradıñ-kurduñ,
O nart halkı, alan halkı, As-Alan!
O nart halkı, alan halkı, as-salam!
O nart halkı, alan halkı, orayda!
Bardı seni imanıñ da, diniñ da,
Ösüb kelgen sarıcilik tölüñ da,
Katılmazla Saña kartlık, ölüm da,
Ömürlege caşarıksa As-Alan!
Şan Karaçay-Malkar halkı – As-Alan!
Şam Karaçay-Malkar curtu – As-Alan!
Bügünüñe, tamblaña da as-salam!
Bügünüñe, tamblaña da orayda!
P.S. Açık etib koyarga izlegenim: Bayraknı, Tamganı caraşdırgan, kabıl etgen sagatda da, «Karaçay», «Malkar» deb, ekige bölünñen halkıbıznı birligin esde tuthanbız. Millet Oraydabıznı sözlerin cazgan sagatda, eki türlü etgenme: Malkar canı razı bolsa, «As-Alan» («Karaçay-Malkar») atlı variantı kallıkdı, alay bolmasa – kuru «Karaçay» atlı variantı sogullukdu, cırlannıkdı. Birin Karaçayga, birin da Karaçay-Malkarga coralab, eki türlüsü bla da bollukdu hayırlanırga.
