Karaçay Malkar Türkiye

Gülüse Cerimi

Suklanama kanatlıga,
Körlükdü seni.
Cüregimi taralganın,
Bildirse meni.
Aşigama, aruvçugum,
Caznı kününe.
“Süymeklik” deb men cazar üçün
Köknü cüzüne...

Suklanama Kavkazımı
Kök tavlarına.
Ala kuru da karayla
Seni allınga.
İynaklayla meni üçün,
Işara sanga,
Çakıradıla bizni da
Süymeklik tangga.

Suklanama adamına
Kelir ömürnü,
Aruvlugunu cırlarla
Ala da seni.
Mıdah bolmay ol zamanda
Aşır kününü.
Caşarıksa cırlarımda,
Sakla kesini...

Cerni öşünün casaydıla
Köksül budayla,
Sabanlanı caşnatadıla
Ol caşil cayla.
Biyagınlay çagadıla
Çeget etekle.
Sagışlana saklaydıla
Çınar terekle.

Suklanama duniyanı
Seyirligine,
Aruvluknu belgisiça,
Caş türsününe.
Caşavumda, har zamanda
Bereme baga
Seni menge colukdurgan
Ol aşhı adamga.

Hür tögüled çırayıngdan
Cılıta cerni,
Caşavumu nür tayagı,
Seyir ertdeni.
İgi sagan, tüşge eding
Kelib üyüme.
Bar esimi berir edim
Senge, süyüne...

Tavlarımı kögürçünü,
Cazgı gokkası.
Süymekligimi sezimi
Sende tohtasın.
Ay da, kün da ekibizni
Alay carıtsın:
Caşavumda endi sensiz
Künüm batmasın...