Karaçay Malkar Türkiye

"Aldanmağız ahırzaman duniyağa..."

Jannet degen oldu, halın aytayım,
Kulak salıp tıngılağız har dayım.
Hadislede körgenime kaytayım, –
Aldanmağız ahırzaman duniyağa.

Açıp jerde bizni üçün jannetin,
Jarathandı aşın, suvun, şerbetin,
Zemzem suvun, alham-türlü kögetin, –
Aldanmağız ahırzaman duniyağa.

İşlegennge jannet eşik açılır,
Nür tögülür, şafavatla çaçılır,
Mahtav, rahmu, keçginlik da tabılır, –
Aldanmağız ahırzaman duniyağa.

Zulmuçula jahanimge kirirle,
Süyekleri janngan otda küerle,
Keç bilirle, tobukların tüerle, –
Aldanmağız ahırzaman duniyağa.

Sıylı kulla safarların süerle,
Jetmiş türlü dariy kiyim kiyerle,
Bir birine salat-salam iyerle, –
Aldanmağız ahırzaman duniyağa.

Har adamnı tüzlügü terk bilinir,
Ahıratda ülüş bolup kelinir,
Anga köre saylav, kulluk berilir,–
Aldanmağız ahırzaman duniyağa.

Tüplerine altın tahta salınır,
Tübü bla tatlı suvla barılır,
Har bir içgi anda halal bolunur, –
Aldanmağız ahırzaman duniyağa.

Kollarında nür tıyılmaz jarıkdan,
Kıynalmazla ne jılıdan, suvukdan,
İnjilmezle bir da anda tarlıkdan, –
Aldanmağız ahırzaman duniyağa.

Kögetleri türsününde bir bolup,
Çaynağanda, har birisi ming bolup,
Ol zavukğa jetişirik kim bolur? –
Aldanmağız ahırzaman duniyağa.

Neden süyse, kelip andan aşarla,
Tüplerine atles töşek atarla,
Bu zavukğa kirip, anda jaşarla, –
Aldanmağız ahırzaman duniyağa.

Ol zavukğa nasıplıla jeterle,
Sıylı Allahha ziyaratla eterle,
Assı kulla andan uzak keterle, –
Aldanmağız ahırzaman duniyağa.

Küreşeyik iyman bla ölürge,
Sıylı Allahnı anda nürün körürge,
Janıbıznı hak joluna berirge,–
Aldanmağız ahırzaman duniyağa.

Kyazim haji şaşhanlağa küyedi,
Amal bla juk tapmazın biledi,
Günahları keçilsin dep tileydi,
Aldanmağız ahırzaman duniyağa.

Sıylılığı jartı bolmaz ne takır,
Kyazimni da jannetinge sen çakır,
Kayrı barsa, rahmat tileyd ol fakır,
Aldanmağız ahırzaman duniyağa.

Kelinngendi bu duniyada hıysapha:
YA-rappana, salma uru azapha,
Atma bizni harap bla ilkapha, –
Aldanmağız ahırzaman duniyağa.

Har adamnı sıyrat bla kuvarla,
Günahların, suvapların surarla,
Ahır-aval, anda südnü kurarla, –
Aldanmağız ahırzaman duniyağa.

Kitapların alıp kelip berirle,
Günahların, suvapların körürle,
Günahlını ker ağaçha kerirle, –
Aldanmağız ahırzaman duniyağa.

Kimni kelir ong janından kitabı,
Har işini anda bolur hıykabı,
Kimni kuvanç, kimni jilyav hıysabı,
Aldanmağız ahırzaman duniyağa.

Kimni artdan, soldan alıp kelirle,
«Okuçu!» – dep, betin açıp berirle,
Bu duniyağa oylaşmağan telile,–
Aldanmağız ahırzaman duniyağa.

Ol dep, bu dep, sıltav etip başlarla,
Sokuranıp, hap kim esin taşlarla,
Başıbızğa jetişirik işlelle, –
Aldanmağız ahırzaman duniyağa.

Hazır sıltav kabıl bolmaz birevge,
Sebep kelmez jal barıvdan, tilevden,
Başha kalmaz jahanimge sürüvden,–
Aldanmağız ahırzaman duniyağa.

Ne üçün Allah köknü, jerni jarıtdı?
Akıl berip, anı bizge tanıtdı? –
Barın tolu adam üçün jaratdı,–
Aldanmağız ahırzaman duniyağa.

Bizni üçün kuran, kitap endirdi,
Günah, suvap, ahşı, aman bildirdi,
Jerni, suvnu anı kibik süydürdü, –
Aldanmağız ahırzaman duniyağa.

Aldadık biz fayğambarnı köp kere.
Çarhıbıznı Allah etdik köz köre,
Endi bizge ol çarhıbız ne bere? –
Aldanmağız ahırzaman duniyağa.

Keligiz, biz assılıkdan kaçayık,
Jürekleni igilikge açayık,
Közübüzden kan jilyamuk çaçayık, –
Aldanmağız ahırzaman duniyağa.

Aybat işge arıtayık sanlanı,
İyman bla ketereyik janlanı,
Köp jıymayık kolğa fitna mallanı, –
Aldanmağız ahırzaman duniyağa.

Kyazim haji jalğan zikir etmeydi,
İgilik – az, günah bizden ketmeydi,
Fakır, sözü çapırakdan ötmeydi, –
Aldanmağız ahırzaman duniyağa.

Köple ketgen bu duniyadan keterbiz,
Sak javunlay, ürkgen atlay öterbiz,
Duniya malın, haznaların ne eterbiz? –
Aldanmağız ahırzaman duniyağa.