Karaçay Malkar Türkiye

Ajal

Duniya degen – jalğandı,
Jürekni içi toymaydı.
Ajal degen – katıdı.
Karap körse – koymaydı.

Ajal avruv alaydı:
Sanlarınga jayılır.
Ata-ana, egeç, karındaş –
Bir birinden ayırır.

Ajal degen alaydı:
Marap, körüp tutadı.
Juvup turğan betingi
Akıraplay jutadı.

Ajal avruv kızıvdu, –
Sanlarınga jayılır.
Eki tatlı süygenni
Bir birinden ayırır.

Ajal avruv alaydı:
Uça kelip, konadı,
Tengsinmegen tenglering
Kabır kanga jonadı.

Ajal degen alaydı:
Tar mekyamğa jıyadı,
«Bulbul» degen tilingi,
Söleşdirmey, tıyadı.

Ajal degen alaydı:
Tuv sanlanı eritgen,
Ana bla balanı
Bir birine termiltgen.

Günah işni köp etdim,
Ömürü ölmey kallıkça.
Endi tüşdüm tuzakğa,
Avğa tüşgen balıkça.

Jılım keldi altmışha,
Olturdum kün tuvuşha.
Jolovçuğa jürüvçü –
Jalkav boldum jumuşha.

Çögüçüm jazmay koydu
Suvup ketgen temirni.
Men endi ne eteyim –
Zıraf etgen ömürnü?

Ahlularım, keligiz,
Osuyatımı – jazığız.
Sıylı Allahdan kaytsın,
Kabırımı kazığız.

Alimlege berigiz
Ölügümü juvarğa.
Kardaşlarım, keligiz
Kumğanımdan kuyarğa.

Kiyimimi, kaldırmay,
Fakırlağa berigiz,
Alimleni barın da
Meni kibik körügüz.

Jamavatım, keligiz,
Saf-saf bolup, jıyılıp,
İyman bla öleyik,
Sıylı Allahha sıyınıp.

Keziv manga jetgendi, –
Kalay bolur namazım?
Kimni koluna tüşer
Men fakırnı janazım?

Duniya degen – bir aman
Miner bazar at boldu,
Men da mindim ol atha –
Bir faydasız zat boldu.

Ömürümü tınçaytmay,
Çögüç urup küreşdim.
Ol kadar kıyınımdan
Bir kat kebin üleşdim.

Jaşay-jaşay köp zaman,
İşley-işley tügendim.
Karıvumu tavusup,
Tüz artıma jüğündüm.

Otuz jılımı aytayım –
Kayğı bla eşikde.
Otuz jılımı aytayım –
Bir karangı teşikde.

Bılay bla ömürüm
Tınçaytmayın – boşadım.
Kesim köre turğanlay,
Körmegennge uşadım.

    1919