Karaçay Malkar Türkiye

CIRÇINI AŞIRIV

Büğün col da körünedi bir uzun,
Küçden cetdik. Basıngandı camağat.
Kabır açhand ol toyumsuz avuzun,
Cırçıbıznı cutarıkdı busağat.

Ayazçıkda şuvuldağan terekle,
Şoş boldula, buşuv miting açılıb.
Kelgenlerin körgüzüb bir bölekle,
Söz etelle arlak-berlak çaçılıb.

Kızğanmaydı birev mahtav sözlerin.
Köbden beri hazır kibik bu künge,
Okuyd almay kağıtından közlerin,
Kolu koşa bayram şartnı ölümge.

Söleşelle kalam tuthan er, tişi...
Ölükden da sıy tabarğa cutlana.
Kagıtladan okuydula erişib,
Sadnadaça, keslerine suklana.

«Kağıtçıla», bir borçların tolturub.
Kağıtların hurcunlağa tığarla.
Köp da turmay sürmelerle olturub —
«Kayğı sözle» gazetlede çığarla.

«Hahailatmayd» bügün buşuv birleni.
Cürek cara körünmeydi, taşadad.
Erinlerin katı kıshan erleni
Tinlerinden cılamukça kan ağad.