Karaçay Malkar Türkiye

CERİM

O, tavruhlanı uyası - cerim,
O, erleni da anası - cerim,
Taza suvların içirgen cerim,
Ösdürgen, caşav, küç bergen cerim!

Seni duşmannga koyup ketgenden,
Kanlı cavlarıbızğa koyğandan,
Ala seni kul ceri etgenden,
Kirli soldatları maltağandan

Ese, men, ahır oğumu atıp,
Uruşda, can ayamay, sermeşip,
Köküregimi duşman ok teşip,
Ölürme, seni kuçaklap catıp!

Korkak bolup, ayağım cerimde
Kırdıkga tiygenden ese, batır
Ölüp, catayım köküregingde,
Aman bla aytılmayın atım.

Korkaklağa teng bolğandan ese,
Cüregimi da tankla ezsinle!
Men cerim üçün adamça ölsem,
Ölümü atla maltap ketsinle!

Duşman tüygen, ezgen analanı
Koyup kaçhandan ese va artha,
Carlı ölügüm kelsin alanı
Allarına, cük bolup tor atha!

Azat kuşlanı korkak közlerim
Körgenden ese, seni tas etip,
Cerim, kuşla da, ölümü körüp,
Egeçlerim kibik, sarnav ete,

Uçsunla azat cerni başında,
Erkin barğan kuş kanatı bla
Capsın ölümü, karındaşımlay,
Kanatı camıçığa teng bola.

Mingi tav, seni duşmannga koyğan
Carlı közlerim körgenden ese,
Kanım tögülüp kısır kayağa,
Anı kızarğanın körüp tur sen!

Sizsiz kalay caşarma, tavlarım,
Mingi tavum, Dıhtavum, Kazbegim?!
Kılanç collarım, ak kayalarım,
Çinarlarım, karlarım, suvlarım?!

Kalay unuthun Bahsannı, Terekni?
Tenglerimsiz, kim teng eter meni?
Sizsiz kalay caşarma, kuşlarım?
Sizsiz kalay caşarma, toylarım?

Sizsiz kalay caşarma, cırlarım?
Sizsiz ne eterme, tavruhlarım?
Tavlu anala, tavlu kartlarım,
Sizsiz kalay ölürme, tavlarım?!

Kuş matallı cerim, sensiz kalıp
Turğandan ese çegi cok çakda,
Uruş tüzünde kan cuğu bolup,
Ölüp catarma, seni kuçaklap!..
1942