Karaçay Malkar Türkiye

AYBAŞ ÖGÜZLE

Sabiyligimi aybaş ögüzleri,
kaydasız siz? Bılay az nek bolduğuz?
Cangı tuvğan aylaça müyüzleri,
Manga körünmeyin, kayda kaldığız?

Ahşam karangısın, tangnı carığın
Ol ariv müyüzlerinde eltgenley,
Ak tavlanı, alanı taza karın
Müyüzlerine tınç atıp ketgenley, -

Barıvçu bizni tavlada ögüzle,
Sırtlarığıznı caz künü cılıtıp,
Neda tavla salkını ura küzde,
Tüklü sırtlarığıznı ay carıtıp,

Arbalanı tartıp barğan ögüzle,
Col uzağına karağan ögüzle,
Taşıvulda geben tarthan ögüzle,
Alısından toyup cathan ögüzle,

Endi sizni nek köreme bılay az?
Ne va siz tavdan avupmu ketdpgiz?
Ne va cerim kırdıksızmı kaldı caz?
Ne va ol alısınsızmı kaldı küz?

Ne va sizni cürüşügüz asırı
Akırınmı boldu bu terk zamannga?
kayda tabayım sizni izlep, surap?
Endi nek körünmey kaldığız manga?

Kaydasız, sabiyligim süyüp kalğan,
Cangı tuvğan ay müyüzlü ögüzle?
Endi men siznn bla çıkmam colğa.
Kaysı tavdan avayım, sizni izlep?

Kırdık entda siz otlağan künlede
Kibik çığa, ay da çığadı alay,
Entda körüne suvlada, köllede,
Sizge kelivçüsünley keledi cay.

Suv içgende müyüzleri, közleri
Suvda körünüvçü aybaş ögüzle,
Burun teşiklerin da kengnge kerip,
Alay suv içivçü aybaş ögüzle!

Ketdigizmi men körmez cerge çığıp?
Körünmeyin kaldığız endi manga.
Caşav bara, kuvğunngaça aşığıp.
Kerek bolmaymı kaldığız zamannga?

O, akırın barıvçu ögüzlerim,
Saban sürgen, arba, ağaç da tarthan!
Meni koyup kayrı ketdigiz keri?
Keziv keledi deydile har zatha!

Sabiyligimi aybaş ögüzleri,
Tüşümde köp köreme, tünümde - az.
Manga eştilip turadı köp kere
Tav colda sizni aşıkdırğan avaz.

Müyüzlerin ay carıtıp barıvçu
Ögüzlerim - duniyada ırahatlık,
Colla canında manga kızarıvçu
Çumla, sizge dep kögerivçü kırdık!

Aybaş ögüzlerim, nek bolduğuz az?
Cok bolmağız, cok bolmağanıça ay!
Aybaş ögüzlesiz kalay kalır caz?
Aybaş ögüzlesiz kalay turur cay?

1967