Karaçay Malkar Türkiye

FRONTDA CAZ

1. Entta keldi

Bıyıl da duniyağa kelgendi caz,
Kutulup topla bla kılıçladan,
Har zamandaça, cangı, caşildi ol,
Kökçaç kızça cürüydü ağaçlada.

Entta kelgendi caz bulbul cırlada,
Kırdıkları, ay carık keçeleri
Bla, kan cabalmadı anı betin,
Şkok ot sokur etmedi közlerin.

O, kalay carsıy bolur bıyılğı caz
Har cıl birgesine kelgen kuvançnı
Adam kannga boyalğanın körgende,
Bulbul kanı boyağanın ağaçnı.

Kalay mudah bola bolur caşil caz,
Terekleri kırılğanların körse,
Onsegizcıllık caş erttenligini
koynunda, karındaşı kibik, ölse!..

2. Kırdık

Topla talağan cerde kırdık çığa,
Cavundan sora çığa keçelede,
Erttenlikde - hans iyisi, kök - çuvak,
Kırdık çığadı kan tögülgen cerde.

Ol çığadı caralı soldat kanı
Sarkıp kalğan, tank maltağan duppurda,
Kıyırlarında eski okoplanı,
Tengim, cerni tırnay, ölgen çungurda.

Kırdık çığa uruşda ölgenleni
Atsız, cazıvsuz da kabırlarında,
Kırdık çığa kanım tögülgen cerni
Bıltır topla etgen çungurlarında.

Men köp karağanma cangı kırdıkğa,
Köp kere cathanma anı üsünde,
Alay bir da kuvanmağanma anga
Körgendeça topla talağan cerde.

Kim biledi, men entta az karamam
Caz kırdıkğa, kuvana cüregimden,
Alay men bir zamanda da kuvanmam
Kırdıkğaça kan cuğu bolğan cerde.

Topla talağan cerde kırdık çığa,
Cavundan sora çığa keçelede.
Kırdık bla birge terekle çağa,
Kırdık çığadı kan tögülgen cerde!..

3. Kukuk

Toyğan kukuk katıbızda kıçıra,
Ol ozup ketgen mamır künledeça,
Ol kıçırıv top tavuşha koşula,
Tıngılaybız, sabiyligibizdeça.
Caz keçe, terekle çağa, şuvulday,
Erttenlikde va kukuk kıçıradı.
Caralı caş, ol kukukğa tıngılay,
Kıyın küçsünüp, közlerin kısadı!..

4. Ol caşarğa süe edi

Ol uruş etgen edi sav kışnı,
«Kırdıknı körürmemi?» - dey.
«Karnı uğay, kırdıknı kuçaklap,
Men alay ölürmemi?» - dey.

Caznı dağıda körgen edi ol,
Culduzlanı caz keçede,
Nasıplı bolup cata edi ol
cangı kırdıknı içinde.

Eştdi kanatlılanı cırların,
Kırdık iyisin da eştdi,
«Endi men cerde karnı aklığın
Körürmemi eken?» - dedi.

5. İynekle
On kıçırımda uradıla topla,
Okla tübünde cığıla adamla.
Mında toyup catadıla iynekle,
Avuzlarından caşil şıtı kele.

Kumlu colnu keledile ingirde,
Sütleri köp kızğan celinlerinde.
kurğakdıla alanı cukkaları.
Burun kibik, ırahatdıla barı.

Mamır cılladaça, ırahat kala,
Akırın keledile elge ala.
On kıçırımda uradıla topla,
Elge burunça keledile malla.

Kum - cukkalarında, celinlerinde,
Bata barğan kün da - müyüzlerinde.
Samolöt tavuşdan tolu biyikle.
İngirde elge tınç kele iynekle!..
1943