Karaçay Malkar Türkiye

CAŞARĞA

Buşuv boynubuzdan buvsa da,
Anı, hayt dep, horlap, taşlarğa,
Künübüz karangı bolsa da,
Palahda, boy bermey, caşarğa!

Colubuz ne kıyın bolsa da,
Arısak da, tavkel barırğa,
Uruş celi katı ursa da,
Bügülmezge, erley kalırğa!

Künnü kara tuman bassa da,
Ol tumannı cıra barırğa,
Kuzğun: «Palah!» - dep kıçırsa da,
Caşarğa, kişiley kalırğa!

Kuş tavla başına çıkğança,
Har palahdan alay çığarğa,
Taşdan tavlu mirzev sıkğança,
Ne kıyın bolsa da, caşarğa!

Bu bütünlüğüm çınıkğandı
Kara kıyınlık kelgen künde,
Coyulmağanlayın çıkğandı,
Bayrakça, oklanı tübünden.

Caşavnu küysüz künlerin da
Sınamayın aytmayma anı.
Sarğaldıla erinlerim da,
Köre cerge tögülgen kannı.

Bütünlüğümü köp künde da
Teşip ötdüle küysüz okla,
Men bardım örten içinde da,
Kurşovdan da çıkdım, bek bola.

Batırla kurşovdan çıkğança,
Har palahdan alay çığarğa,
Soldat kurç tanknı horlağança,
Kıyınlıkda horlay caşarğa!..
1942