Karaçay Malkar Türkiye

PALAH KELGENDE

Kuvançnı da, toynu da süygen halkım,
İşni da, bayramnı da süygen halkım!
Bügün uruş canıydı barıbıznı,
Küydüreme deydi toylarıbıznı.
Cerim, sanga kuvana, ösgenme men,
Bügün a buşuvunga küyeme men.
kara palah kirdi bosağabızdan,
Börüle da toyarla adam kandan!..
Körebiz da külün küygen elleni,
Kün sayın asıraybız ölgenleni.
Kesim tursam da uruş tütününde,
Palah buvğanlağa carsıv kölümde.
Bügünden başlap, turur cüregimde
Korkuv uğay da, carsıvum cerime.
Carsıv, sen küç ber manga kıyınlıkda,
Buşuv, sen tıyançağım bol palahda!
Uruş celi suvuthan ot cağala,
kayğıdan abızırağan anala,
Üyretigiz bizni kişi bolurğa,
kıyınlıkda adamlayın kalırğa!
Carlı cerim! Canım, kanım da seni,
Seni bla boldu caşav esebim!
kuvanç kün kuvannganma kuvançınga,
Bu kara kün küyeme açıvunga!
Sıylı cerim, bağalı kününg, keçeng,
Biyik cerim, barırma seni üçün
Calan ayaklayın kılıç avzunda,
Cığılırma cıltırağan buzunga!
Bu kara kününg buvadı boynumdan,
Senden da uyalmay, cilyayma andan!
Sabiyleringe kelgen kara kününg
Unutdurğandı korkuvun ölümnü.
Ah, eşteme sarnay uçhan kuşlanı
Tavlada mudah kanat tavuşların!
Ot etilmegenleyin kalğan üyle,
İyesiz kalıp, uluğan pariyle!
Küyeme men. Alay anı üçünnge
İynanama azatlıknı küçüne.
Tavla, kuşla kişige kul bolmazla,
Suhu suvlarıbız artha barmazla,
Tav çuçhurların cavla tıyalmazla,
İslameyni buğovğa salalmazla,
Mingi tavnu cerge teng etalmazla,
kazbekni karların eritalmazla!
Halkım sav, azat kalır dep iynanıp,
Kesime bayrak etgenme men anı.
Kıralım duşmanların horlarına,
Caşları savut alıp kollarına,
İynannganlay kireme kazavatha,
Duşmanla cerimde candırğan otha,
Uruş etgenle bla birge bara,
Kişilikge, azatlıkğa baş ura!