Karaçay Malkar Türkiye

Mingi Tav (Elbrus)

Sen kökge cete miyikse
Kavkaz tavlanı içinde.
Miyala kibik cıltıray,
kanga buzların üsünde.

Üsünde bardı ak tonun,
Sen cay da, kış da kiyese.
Kün buzulurğa tebrese,
Boran eterge süyese.

Kün ariv, çuvak turganlay,
Tohtamaydı boranın,
Cay da, kış da erimeydi
Üsündegi buzların.

Tögereginde toğay otlayla
Altın müyüzlü kiyikle.
Seni többenge çıgıvçandıla
Bögekle bla cigitle.

Kiyik buvların öküredile
Konguravlanı kakkança,
Cuğuturların turuşadıla
Atlıla çarsha çabhança.

Kablanların, aslanların
Buğoylarına kirelle.
Pokunların, gujdarların
Adam cıyını bilelle.

Ayülerin muruldaydıla
şındık çegetni içinde.
Börülerin kalkıydıla
Koylanı köre tüşünde.

Kök caşnasa sızdıralla
Eteklerin cel ete...
Menden küçlü cokdu deb,
Kesin kesine köl ete.

Kablanların karab turalla
Beklege kirib, mınayıb,
Borsukların, tülkülerin
Cuvuk barırda uyalıb.

Kankazların kankıldaydıla,
Çın tavukların cırlayla.
Kargaların kark-kurk ete,
Mıllık tabmayın cılayla.

Kögorçünlerin cüvüldeydile
Künün cıltırab kakkanlay,
Maralların otlaydıla
Gelev kırdıkga bathanlay.

Çıpçıkların, çavkaların
Buday ındırnı çöbleyle.
Ararat bla Kazbek tav
Sanga tügel cetmeyle.

Ullu kuşla sanga konsala
Üyle kibik karaşıb,
Cur tekele cıgılsala
Sürüvlerinden acaşıb.

Küz artında turnaların
Avub ketelle tengizge,
Kışha hazır boluguz deb,
Eskertivçense sen bizge.

Senden sora kaysı tavdu
Arivluk bla bay bolgan,
Başı kış bolub, beli caz bolub,
Eteklerinde cay bolgan?

Mingi Tav bla Kazbek tav,
Aragız ariv cibek av...
Sen kiyiz börknü agarta,
Etegin caşil katapa.

Sen culduzlaga canaşa,
Kalganla senden alaşa,
Bir-birigizge karaşa,
Kalay seyirsiz, tamaşa!

Buznu, karnı cıyıvçu,
Başına bulut konuvçu,
Tögeregine basınıb
Tavlula karab toymavçu.

Kış aylanı boranısa,
Cay aylanı salkını.
Cumuşaklık etmesen
incitirikse halkını.

Kesin begitmey çıkganga
Başha bolmay bir cavsa,
Sav duniyanı başında
Em belgili bir tavsa.